Nabiktima sang pagpameke sang kwarta ang pila manobaligya sang panakot sa Banate, Iloilo.
Sa interview sang Bombo Radyo kay Police Captain Randy Lambungan, Chief of Police sang Banate Municipal Police Station, iya ginpahayag nga nagbayad ang mga suspek sang libohon nila nga kwarta kon sa diin, ginkambyohan sila sang vendors sang matuod nga kwarta.
Suno kay Lambungan, naga-tagalog pa ang mga suspek sa tion sang ila ang nagabakal sang ahos, bombay kag iban pa.
Apang, ginalantaw man ini sang natungdan nga mahimo estrahitiya lamang ini sang mga suspek agud nga indi sila gilayon nga matiktikan.
Gintuad man sini nga apat tanan ka mga suspek ang natumod nga nagpameke sang kwarta apang, duha lang diri ang nadakpan, samtang ang duha ang nakapalagyo.
Nagpanugyan man ang Banate PNP sa publiko nga mangin mahinalongon kag mabusisi sa pagbaton sang kwarta.
