Ginpatpat sang isa ka public law expert ang insakto nga pagpasaka sang kaso sa Prosecutors’ Office.
Sa interview sang Bombo Radyo kay Atty. Cedric Jaranilla, Assistant Regional Prosecutor, iya ginpahayag nga may duha ka mga proseso agud nga makapasaka sang kaso ukon complaint sa Prosecutors’ Office.
Ini amo ang regular filing kag inquest proceedings.
Suno kay Jaranilla, mahimo nga magpasaka sang kaso paagi sa una nga tikang, ang regular filing; ini nagapatuhoy sa kinaandan nga proseso sa pagsugod sang isa ka legal nga aksyon, sa kinaandan paagi sa isa ka pormal nga reklamo ukon impormasyon, nga ginasundan sang isa ka una nga imbestigasyon, nga nagahatag sang bastante nga tion para sa duha ka partido sa pagpresentar sang ebidensya, kag pagpadayon sa pagbista kon ang probable cause makita.
Dugang sini nga ang korte mahimo mag-evaluate sang mga supporting affidavits ukon personal nga mag-usisa sa pagsulat kag sa under oath sang tagreklamo lakip ang iya mga saksi agud mahibaluan kon may yara sang posible nga probable cause.
Ang masunod nga tikang amo ang inquest proceedings, ini ang isa ka summary sang judicial investigation nga ginhimo sang isa ka public prosecutor agud mahibaluan kon ang isa ka tawo nga gindakop nga wala sang warrant ang dapat pormal nga pasakaan sang kaso sa korte.
Ginpahayag man ni Jaranilla nga katuyuan sang isa ka inquest amo ang pagdeterminar kon bala may bastante nga basehan sa pormal nga pag-akusar sa isa ka tawo nga gindakop nga wala sang warrant (warrantless arrest).
Nahibaluan nga ang mga paghusay ukon inquest proceedings partikular nga naaplikar kon ang isa ka tawo ginadakop nga wala sang warrant of arrest nga gin-isyu sang korte.
