Patay ang isa ka lalaki matapos nga ginbuno sang iya kasilingan sa Barangay Calumpang, Molo, Iloilo City.
Ang biktima amo si alyas Joseph, 43-anyos, samtang ang suspek amo si alyas Michael, 32-anyos, isa ka construction worker kag residente sang nasambit nga barangay.
Sa interview sang Bombo Radyo kay Police Captain Ryan Christ Inot, hepe kang Iloilo City Police Station 4, iya ginpahayag nga nag-ugat ang indi paghangpanay sang gin-bully sang biktima ang manghod sang suspek.
Suno kay Inot, nagpanugid ang manghod sang suspek nga gina-bully siya sang biktima nga kasilingan lamang nila.
Sang nabal-an naman sang suspek, gilayon ini nga nagkuha sang kutsilyo kag ginpalapitan kag ginbuno ang biktima.
Ginpahayag naman ni Inot nga may impluwensya sang makahulubog nga ilimnon ang suspek.
Nakuha man sa paghinakop sang suspek ang kutsilyo nga gingamit sa krimen.
Gilayon man ini nga gindakop sang mga barangay tanod kag subong, yara na sa presohan kag nagapangatubang sa kaso nga homicide.
