Nagpanawagan ang Makabayan Coalition sa publiko nga untaton na ang red-tagging sa ila mga miyembro, ilabi na sa mga party-list groups kag mga kandidato sa Senado, samtang nagahilapit ang 2025 midterm elections.
Ini nga panawagan ang ginhimo matapos nakit-an ang mga red-tagging posters nga naglapta sa syudad sang Iloilo kag iban pa nga parte sang Western Visayas.
Sa interview sang Bombo Radyo kay Crimson Labinghisa, Representative sang Kabataan Party-List, iya ginpahayag nga ini nga sahi sang tikang ang indi lang malain kag makahalalit, kundi ilegal man.
Ginpabutyag man ni Labinghisa nga ang mga grupo nga nagabug-os sang Makabayan Coalition ang nagapanguna sa pagpasar sang mga layi nga nagabatak sa kabuhi sang mga ordinary nga Pilipino, lakip na ang pagtaas sang suweldo, pagpasigurado sang maayo nga kalidad nga edukasyon, kag pagpadayon sang serbisyo publiko para sa tanan.
Suno pa sa iya, ang red-tagging ang wala lang nagatuga sang paghigko sa reputasyon kundi nagapadugang man sang harassment kag kahadlok sa mga gina-target nga indibidwal kag organisasyon.
Nagapanawagan man ang Makabayan Coalition sa mga otoridad nga imbestigaran kon sin-o ang responsable sa pagpaskil sang red-tagging posters sa Iloilo kag Western Visayas.
Ginapanawagan man nila sa Commission on Elections (COMELEC) kag sa publiko nga protektahan ang kinamatarong sang mga kandidato kag likawan ang harassment.
