Natul-id na sang Dumangas Municipal Police Station ang gunman nga nagtiro-patay sa isa ka lalaki sa Brgy. Sulangan, Dumangas, Iloilo.
Ang biktima amo si Angelo Gonzales, 23-anyos, single, residente sang nasambit nga barangay.
Sa interview sang Bombo Radyo kay Police Master Sergeant Efren Gonzaga, Imbestigador sang Dumangas Municipal Police Station, iya ginpahayag nga indi na makita ang mga ‘whereabout’ sang mga suspek apang ginpadulongan sang talatapan ang puluy-an mismo sang nagpangamot sa krimen.
Suno kay Gonzaga, gunman pa lang ang ila na-identify subong kag may ginasundan naman nga persona nga mahimo nagserbe nga driver sang motorsiklo.
Ginpahayag man sini nga kakilala sang biktima ang mga suspek bangud nagapuyo sila sa isa ka barangay.
Santo naman sa panaysayon sang witness, luwas sa pagbinaisay sang mga suspek kag sang biktima may daan na nga hiligut-anon sa tunga sang magtimbang nga kampo antes pa man natabo ang krimen.
Nahibaluan nga nakaagum sang pilas sa tiyan kag likod ang biktima nga gintunaan sang iya kamatayon.
Narecover naman sang kapulisan sa crime scene ang empty shell sang posible .45 caliber.
