Ginpasakaan sang kaso sa Ombudsman si Punong Barangay Greg Espinosa sang Barangay Legaspi Dela Rama, Iloilo City Proper bangud sa ginapasuni pagpapreso sang supporter sang Team Gugma.
Sa gin-file nga kaso ni Cherrylyn Molina sang Barangay Balabag Sta. Barbara, Iloilo, pangatubangon ni Espinosa ang mga kaso nga Grave Misconduct, Being Notoriously Undesirable, Oppression kag Conduct Prejudicial to the Best Interest of the Service.
Suno sa tagreklamo, ginreport sila sang kapitan sa pulis nga nagapanggamo sa Barangay apisar wala ini sang kamatuoran.
Nagapati ini sila nga ang pagpapreso kay Molina ang pamaagi sang punong barangay agud mapahog ang ila pamilya kag mapilitan nga suportahan ang Team Uswag.
Ginapasuni man ginpangkakas ni Punong Barangay Espinosa ang mga tarpaulin sang Team Sulong Gugma nga yara mismo sa balay sang mga tagreklamo.
Nakabutang man sa reklamo nga mapatuman ang ila barangay sang “open ballot policy” agud makita nila kun sino ang ginpangpili sang ila mga residente.
Nagpamahog man si Espinosa nga ipakakas niya ang tanan nga mga job hires sa Iloilo City Hall nga himata ni Molina kun padayunon nila ang pagsuporta sa nga kandidato sang pihak nga partido.
Kaangot diri, nagsabat ang natungdan nga punong barangay.
Sa interview sang Bombo Radyo kay Punong Barangay Espinosa, ginpanginwala sini ang tanan nga mga nasambit nga alegasyon nga ginabato sa iya ni Molina.
Suno sa punong barangay, may residente nga nag-report sa iya nga si Molina ang nagawakal sa tunga sang ila dalan apisar nga wala sang may naintindihan.
Para sa ila, nagatuga lang ini sang kagahod.
Dugang ni Espinosa, nagtawag siya sa iya nga secretarya agud nga makapangayo sang bulig kag makaistorya ang residente nga nag-report kag si Molina.
Apang, wala gid nahusay ang duha ka kampo, rason nga nagpatawag na lang siya sang kapulisan.
Ginpunto man sini nga kon nakig-istorya lang sa maayo si Molina sa kapulisan, wala sang rason nga dakpon ini.
Gin-athag man sang punong barangay nga wala siya nakapangkakas sang mga campaign posters sang Team Sulong Gugma bangud mismo siya ang nagpahanugot nga makapatuman sang mini grand rally sa ila barangay.
