Padayon nga ginabulong sa hospital ng duha ka indibidwal nga involved sa vehicular accident kaina sang aga sa Sunset Boulevard sa Barangay Tabucan, Mandurriao, Iloilo City.
Ang driver sang motor amo ang 23-anyos nga lalaki, samtang ang angkas naman amo ang 42-anyos nga babaye kag lunsay residente sang Cagbang, Oton, Iloilo
Sa interview sang Bombo Radyo kay Patrolman Jonelle Alimodian, Traffic Investigator sang Traffic Enforcement Unit, iya ginpahayag nga halin sa distrito sang Mandurriao ang duha kag papauli na kuntani sa banwa sang Oton.
Santo sa imbestigasyon, napiyungan ang driver sang motorsiklo kun sa diin nag-overshoot ini sila sa gutter sang karsada rason nga nag-awas man sa motor ang driver kag nagpabilin ang angkas sini asta nga nabunggo sa street light.
Nagaguwa man sa report nga nagapanimaho sang makahulubog nga ilimnon ang duha.
Pilas sa nagkalain lain nga parte nga lawas ang naagum sang duha apang kritikal ang driver sang motorsiklo kun sa diin padayon nga ginabulong Western Visayas Medical Center samtang sa West Visayas State University Medical Center (WVSU-MC) ang angkas sini.
