Naglaum ang mga drivers kag operators sa Panay nga may guidelines nga mapaguwa ang Department of Transportation (DOTr) agud nga makabyahe sila nga mga unconsolidated.
Sa interview sang Bombo Radyo kay Elmer Forro, Lead Convenor sang No to PUV Phase-out Coalition, iya ginpahayag nga indi sila mag-untat nga magpanawagan nga ibalik ang prangkisa sang mga unconsolidated traditional jeepneys.
Suno kay Forro, nagalaum siya nga makabalik-byahe ang mga drivers kag operators kasunod man sang pagpasalig ni Transportation Sec. Vince Dizon kag i-suspend ang implementasyon sang PUV Modernization Program.
Ginhatagan pagtamod ni Forro nga madamo sang mga jeepney drivers ang napilitan nga magsaylo sang trabaho sa food service, construction, kag iban pa nga labor industries bangud sa epekto sang modernization program.
Gintumod man nila ang Republic Act 4136, nga nagabutang sang mga pagsulundan sa serbisyo sa transportasyon sa duta, bilang basehan sang ila panawagan para sa pagbag-o sang prangkisa.
Nagpaandam si Forro nga kun mapaslawan ang DOTr sa pagpagwa sang paborable nga desisyon sa gintalana nga tion, mahimo ini magdul-ong sa mas malapad nga aksyon protesta.
