Ginpasigurado sang Iloilo City Police Station 10 nga indi na liwat nga pagsuliton sang lalaki nga vlogger ang tuyo sini nga magsaka sa signage tower sang Plazuela De Iloilo sa Mandurriao, Iloilo City.
Ini amo si Alyas Joms, residente sang Janiuay, Iloilo kag isa ka vlogger.
Sa interview sang Bombo Radyo kay Police Captain Val Cambel, Chief of Police sang Iloilo City Police Station 10, iya ginpahayag nga natapos na ang first phase sang psychiatric evaluation sang vlogger.
Apang, gintuad sini nga indi pa mapat-ud ang mangin resulta sang medical sang vlogger bangud may mga series of examination pa ang igapatuman.
Ginpahayag man ni Cambel nga ang positibo nga nakit-an sang talatapan sa sitwasyon sang vlogger, amo ang matuod-tuod nga kahimtangan sang pamilya sini.
Bangud man diri, nagtanyag ang pila ka hospital nga i-cater ang kinahanglanon sang anak sang vlogger nga may buho ang tutonlan.
Kon balikan, kahapon nga adlaw, ginpaidalom sa psychiatric evaluation ang vlogger agud nga mapasigurado ang kahimtangan sang iya nga mental health.
Sa subong, yara na ang vlogger sa ila puluy-an samtang padayon ang interventions sang mga doctor sa iya mental state.
