Nag-update ang Holy See Press Office nga nagapadayon ang pag-improve sang health condition ni Pope Francis kag mas gamay na lang nga oxygenation ang ginagamit sini subong.
Nagaapayo ang Santo Papa sa iya ginapuy-an sa Vatican nga amo ang Casa Santa Marta matapos ang masobra isa ka bulan nga pagtinir sa ospital sa Roma bangud sa polymicrobial infection nga nag-resulta sa bilateral pneumonia.
Ginpaguwa si Pope sang Marso 23 apang gin-require ini sang medical team nga magpahuway sang duha ka bulan samtang yara sa Vatican.
Suno pa sa Holy See, may gamay na nga respiratory, mobility, kag voice-related improvements, kag mayo man ang resulta sa blood tests sa 88-anyos nga Pope.
Sa adlaw, makapalawig ini sa pagginhawa nga wala sang administered oxygen.
Gin-athag man sang Press Office nga temprano pa subong agud diskusyunan kun ano ang mga partisipasyon sang Pope sa Holy Week liturgies.
Ini nga latest update ang nagguwa kasunod sang pagbisita nanday British King Charles III kag Queen Camilla sa Casa Santa Marta.
Sorpresa man nga nagpakita ang Pope sa St. Peter’s Basilica nga nakasuksok sang itom nga pants sa baylo nga iya kinaandan nga tradisyonal nga papal attire. Samtang sakay sa iya wheelchair kag nagatamyaw sa mga tumuluo sa Basilica, may nakabutang man sa pope nga striped blanket kag may gamay nga hose sa iya nga ilong.#
