Ginalantaw ni Board Member Ramon Sullano nga insakto ang tikang sang mga transport cooperatives nga magsulat sang petition letter agud nga makuha ang atensyon ni Department of Transportation Sec. Vince Dizon kaangot Public Utility Vehicle (PUV) Modernization Program.
Sa interview sang Bombo Radyo kay Board Member Sullano, ang chairman sang Committee on Transportation sang Sangguniang Panlalawigan sang Iloilo, iya ginpahayag nga nagasunod lamang ang probinsya sa kon ano ang deriktiba sang national government nahanungod sa Modernization Program.
Suno kay Sullano, kon pahanugotan gidman ang mga unconsolidated jeepney nga makabyahe liwat, magaguwa nga disbentaha ini sa mga transport cooperative nga naghatag sang ila tyempo agud nga mangin myembro sang isa ka kooperatiba.
Dugang sini nga nagsunod lamang ang transport cooperatives sa mandu sang gobyerno.
Una na nga nagpasa sang petition letter sa Land Transportation Franchising and Regulatory Board (LTFRB) ang pila ka transport cooperatives lakip ang Iloilo City Loop Alliance of Jeepney Operators and Drivers Association (ICLAJODA) agud nga indi pagpabalikon-byahe ang mga unconsolidated jeepneys.
Ini kasunod man sa pagpabutyag sang No to PUV Phase-out Coalition nga nagalaum sila nga makabalik-byahe ang mga drivers kag operators kasunod sang pagpasalig ni Transportation Sec. Vince Dizon nga i-suspend ang implementasyon sang PUV Modernization Program.
