Pilason ang isa ka pulis matapos ginbuno kag ginlabo sang ginpahayag hubog nga mga lalaki sa Sitio Camindez, Barangay Bancal, Carles, Iloilo sang ini ang nagresponde sa isa ka komosyon.
Ini amo si Police Master Sergeant Michael Ilanga, naka-assign sa Carles Municipal Police Station.
Sa interview sang Bombo Radyo kay Police Lt. Col. Arnel Solis, spokesperson sang Police Regional Office VI, iya ginpahayag nga nagpangayo sang bulig si Christian, hinablos ni Ilanga, matapos sila ang ginlampusan sang apat ka lalaki sang yara pa ang mga ini sa Brgy. Cabilao Grande sa nasambit nga banwa.
Suno kay Solis, gilayon nga nagpadulong si Master Sergeant Ilanga upod ang mga biktima sa Brgy. Bancal agud imbestigaran ang hitabo.
Samtang nagapangusisa pa lang ang pulis, ginsumbag ini sang suspek nga si alyas Edcel, kag pagkatapos sini, natumba ini kag ginlabo ni alyas Edwin, 69-anyos, gamit ang binangon.
Gilayon man nga gin-gabot ni Master Sergeant Ilanga ang iya service firearm kag gintiro si alyas Edwin.
Matapos sini, nakapalagyo sanday Master Sergeant Ilanga, kaupod ang hinablos sini nga si Christian, kag abyan sini nga si William, apang nabilin naman si Dione sa diin gingapos ini kag pilason sang ginrespondehan sang mga kapulisan.
Arestado na subong ang lima ka mga suspek nga sanday Edwin, Edcel, Cyrus, Peter, kag Gerald.
Padayon naman nga ginabulong sa ospital si Master Sergeant Ilanga, samtang nagapadayon man ang imbestigasyon sang Carles Municipal Police Station sa nasambit nga insidente.
