Ginaabisohan sang Iloilo Provincial Health Office ang mga deboto nga magapartisipar sa pagtaltal ukon magpaidalom sa physical penance nga gilayon ipa-check sa healthcare workers ang mga pilas agud malikawan ang bacterial kag tetanus infection.
Sa interview sang Bombo Radyo kay Dr. Maria Socorro Quiรฑon, Head sang Provincial Health Office, iya ginpahayag nga indi man mahimo nga punggan ang mga tawo nga luyag magpenitensya bangud kabahin na ini sang ila nga tradisyon kada Semana Santa.
Magluwas sa mga nagapartisipar sa pagtaltal, may iban naman nga nagabisita sa mga pilgrims.
Dugang pa ni Quiรฑon, nagakadapat man nga magbalon sang bastante nga tubig ang publiko ilabi na nga tuman ang init.
Ang mga katigulangan nga may hypertension ang kinahanglan nga mag-inom sang maintenance nga bulong.
Sa mga nagasaka sa bukid, mas maayo pahayag niya nga maghatag sang pila ka minuto sa pagpasilong ukon pagkadto sa mahandong nga lugar.
Panugyan sini, indi anay mag-inom sang mga kape kag softdrinks bangud nagatuga pa gid ini sang dehydration.
Sa iban nga maga-upod sa mga religious activities kaangay sa mga prusisyon, magsuksok sang komportable nga bayo, magbitbit sang payong agud indi matam-an sang init.
Mas maayo man suno kay Dr. Quiรฑon nga magdala na lang sang mga pagkaon nga ginluto sa tagsa ka mga panimalay agud malikawan ang food borne diseases.
Nagapangabay ang natungdan nga mapabilin nga hilway, malinong kag safe ang Semana Santa.
Sa Iloilo Province, pila ka mga destinasyon kag popular nga mga pilgrims amo ang Bucari sa Leon; Agony Hill sa Alimodian, Garin Farm Pilgrimage Resort sa San Joaquin, kag โAng Pagtaltalโ sa Barotac Viejo.
