Ginpa-Bombo sang isa ka pamilya ang isa ka punong barangay sa Oton bangud sa ginaalegar pagpangtaya sang armas-luthang samtang yara sa idalom sang impluwensya sang makahulubog nga ilimnon.
Ang ginareklamo nga punong barangay amo si Cezar Cabillon Jr. sang Mambog, Oton.
Natabo ang ginaalegar pagpangtaya ni Cabillon sa Brgy. Caboloan Sur samtang may practice ang Tribu Cambitu sang Cambitu Elementary School para sa Katagman Festival.
Ang ginapahayag nga tagreklamo amo si alyas Josh, 20, residente sang Caboloan Norte sang amo nga banwa.
Nakuhaan pa sang video ang masunod nga mga hitabo kun sa diin mabatian ang ginaalegar nga tingog ni Cabillon nga ginapahog sini si alyas Josh kag nagsiling nga indi siya basta-basta nga kapitan kag may mga ginpatay na ini nga mga tawo kag posible malakip diri ang tagreklamo.
Sa video, ginsiling man ni Cabillon nga dapat maghalong si Josh kag tandaan niya ini bilang kapitan sang Mambog nga nagapangtumba sang tawo.
Sa interview naman sang Bombo Radyo kay Cabillon, iya ginpahayag nga antes pa man niya ginsita si Josh, ginpahayag nga may ginharass ang amo nga tagreklamo nga drummers sang tribu Cambitu kag gintayaan pa ni Josh sang kutsilyo ang pila ka kabataan.
Suno kay Cabillon, sa pagkamatuod, napa-blotter na sa pulis ang ginhimo ni Josh bangud nahadlok ang kabataan.
Pahayag ni Cabillon, pagkasunod nga gab-i, nakit-an niya si Josh sa lugar kag didto na niya ini gin-akigan.
Dugang niya, siya ang tribe manager sang Tribu Cambitu kag ginaproteksyonan lamang niya ang iya kabataan nga mga menor de edad.
Ginpanginwala naman sang opisyal nga hubog ini sang natabo ang insidente kag nanindugan nga wala ini sang nauyatan nga armas.
Ginkumpirma naman ni Cabillon nga may yara gid man siya sang ginpamatay sang una.
Suno sa iya, sang 1980’s sang myembro ini sang militar, duha ka mga rebelde ang iya napatay matapos nga ginbuno siya sang mga ini.
May mga napatay man ini nga mga rebelde sa iban nga mga operasyon nila sa kabukiran sang Panay sang una.
Gin-athag naman niya nga ginpahog lang niya si alyas Josh agud matahap ini bangud tuman gid man ini kadungol.
