Gahilibion nga ginasaysay sang pamilya sang isa ka Ilonggo seafarer matapos nga nalakip sa apat nga napatay sang nagkapan ang MV Hong Hai 16 sa kadagatan nga sakop sang Malawaan, Rizal, Occidental Mindoro.
Ang seafarer amo si Mark Dave Calopez, 24, kag residente sang Brgy. Capt. Fernando, Leon, Iloilo.
Sa interview sang Bombo Radyo kay Mr. Vicente Calopez amay sang biktima, iya ginpahayag nga indi na nila ma-contact ang iya bata bag-o natabo ang insidente.
Suno kay Calopez, Huwebes na sang sila ang nakahibalo nga nalakip ang ila bata sa apat nga napatay sa nasambit nga insidente.
Gin-athag man ni Calopez nga sa engine room mismo na-recover ang lawas sang iya bata upod sang bangkay sang ila nga 2nd mate.
Dugang pa sang natungdan mga isa nalang kuntani ka semana kag matapos na sang iya bata ang iya apprentice kag mapuli na ini kuntani kag magproseso na sang iya requirements sa Manila.
Sa subong, ginahulat nalang sang pamilya ang bangkay, bangud ipaidalom pa ini sa autopsy examination.
