Nangin masandukot ang pagpanghangkat kag kadalag-an ang naagyan ni Atty. Jerome Asuga antes pa man sini nalab-ot ang pagserbe bilang Regional Director sang National Police Commission (NAPOLCOM).
Sa pagpakigbahin ni Atty. Asuga sang iya istorya sa Siete Palabras, ginpahayag sini nga paagi sa seminaryo, nagdalom pagid ang iya pagkilala kag pagtuo kay Jesus.
Nagsugod ini sang isa ka adlaw, las-9:00 sang aga, wala sang tawo ang chapel kag siya ang nagaisahanon lamang; pagbayaw niya sang bible, nakabatyag siya nga daw kaangay nga may nagkupo sa iya, kon sa diin, nagapati siya nga ini amo si Jesus Kristo.
Sugod sa amo nga adlaw, nangin personal na ang iya nangin relasyon sa Ginoo.
Samtang, sang naguwa sa seminaryo si Asuga sang siya ang yara sa second year college kag naga-edad sang 18, daw gintakloban siya sang kasubo, matapos ang pagtaliwan sang iya iloy.
Sa iya nga pagdumdom, naghinulsol siya bangud sa pila ka bulan nga wala sila nagkitaay sang iya iloy antes nadula sa kalibutan.
Wala sini napunggan nga basulon ang Ginoo sa natabo sa iya pamilya, rason man sang iya pagka-uhaw sang pagpalangga sang Mahal nga Maka-ako.
Sang nagpangamuyo siya, nagtahaw ang sakit nga iya nabatyagan ilabi na sa iya nga pagpang-ampo sa Mahal nga Birhen, kon sa diin, nabatyagan niya ang pagpalangga sang isa ka iloy.
Ginlaragway sini nga ang ‘best version’ sang iya kaugalingon amo ang makita ni Jesus nga nagapati siya sa buluhaton nga gintudlo sang Ginoo.
Paghidaet, kalipay, kag pagpalangga ang ginpabatyag sa iya ni Jesus nga nangin palaagyan agud siya ang makaserbisyo sa publiko bilang isa ka abogado.
