ILOILO – Proud ang pamilya sang Ilongga beauty queen nga si Alexie Mae Caimoso Brooks sa Barangay Buga, Leon, Iloilo matapos ginkoronahan ini bilang Miss Eco International 2025.
Sa interview sang Bombo Radyo kay Rose Caimoso Calasabsab, pamilya ni Alexie, iya ginpahayag nga tuman ang iya kalipay matapos nakadala ini sang bugal sa Pilipinas.
Suno kay Calasabsab, bata pa lang si Alexie, nagatinguha gid ini sa tanan nga mga kompetisyon nga iya ginapasakupan.
Sang una suno sa natungdan, luyag sang Ilongga beauty queen nga mangin atleta, kag sa ulihi, ginsulod naman sini ang patag sang pageantry.
Apang wala man nangin mahapos ang paglab-ot ni Alexie sa iya handom bangud nabiktima man ini sang bullying sa diin ginasunlog ini sang mga kabataan nga ‘Ati’ bangud sa color sang iya panit.
Sa baylo nga mangakig suno sa natungdan, ginapili ni Alexie nga magpa-umod.
Ini nga pagbinatasan suno sa iya pamilya ang nadala ini Alexie sang nagdako na ini sa diin ang mga naga-bully sa iya sadto ang naga-idolo naman sa iya sa subong.
Nangin dalangpan man sini ang iya ‘Lola Basing’ nga amo ang nagpadako sa iya sa diin naapektuhan gid ini sang tuman matapos nagtaliwan ini.
