ILOILO – Magapatigayon ang Philippine Air Force sang nationwide qualifying examination para sa mga nagaplano nga mangin kabahin sang Officer Candidate Course kag Special Enlistment para sa Calendar Year 2026.
Sa interview sang Bombo Radyo kay 2nd Lieutenant Nonilo Cuesta, Assistant Director of Administration and Personnel sang Tactical Operations Group 6, iya ginpahayag nga natalana ini nga patigayunon sa Hunyo 10 tubtob 11 sa Camp General Adriano Hernandez sa Dingle, Iloilo.
Suno kay Cuesta, pangunahan ang examination sang Tactical Operations Group 6, ang branch sang Philippine Air Force sa Western Visayas.
Lakip sa mga qualifications amo ang natural born/naturalized Filipino citizen, single kag wala nakaagi pakasal, wala sang anak, may good moral character, nakapasar sa physical/medical examination kag nahatagan sang physical profile sang Philippine Air Force medical board, kag 152.4 centimeters ukon 5 feet ang kataason para sa mga lalaki kag babaye.
Sa mga luyag nga mangin officer, nagakadapat nga Baccalaureate Degree Holder ukon graduate sang Priority Course nga kinahanglan sang Philippine Air Force kag indi magnubo sa 20 anyos ang edad ukon apang indi maglapaw sa 27 anyos sa adlaw sang appointment.
Sa mga luyag nga mangin kabahin sang special englistment, nagakadapat naman nga nakatapos sang K to 12 Basic Education Program ukon nakakuha sang at least 72 units sang Collegiate course sa Educational Institution nga ginakilala sang gobyerno kag indi dapat magnubo ang edad sa 18 anyos kag indi maglapaw sa 35 anyos sa adlaw sang enlistment.
Sa mga interesado naman, magpadulong lang sa malapit nga Unit sang Philippine Air Force.
