Nagsaka na sa siyam ang numero sang patay kasunod sang pagkalugdang sang barko nga MV Hong Hai 16 sa Rizal, Occidental Mindoro.
Ini matapos ang dugang nga mga bangkay nga na-recover sa nagligad nga Lenten break lakip na ang duha kahapon, Easter Sunday.
Suno kay Lt Jr. Grade Kenneth Bongabong, PCG Occidental Mindoro Station Commander, duha pa ka missing mga indibidwal ang ila padayon nga ginapangita.
25 crew members ang sakay sang barko kun sa diin 13 ang mga Pinoy kag 12 ang Chinese nationals sang natabo ang insidente sang nagligad nga Martes Santo.
Matandaan nga sa mga napatay, isa ang kumpirmado nga taga-Leon, Iloilo nga amo si Mark Dave Calopez, 23 anyos, nga isa ka apprentice sa barko.
Una naman nga nagkumpirma ang provincial government sang Occidental Mindoro nga samtang padayon ang imbestigasyon sa natabo, pauntaton anay sini ang operasyon sang Bluemax Tradelink, Inc. nga amo ang kumpaniya sa likod sang dredging sa Lumintao River. Subong nga adlaw natalana nga ipaguwa ang cease-and-desist order sa Bluemax.
Ginmanduan man ang tag-iya sang barko nga Keen Peak Corp. nga kuhaon na ang MV Hong Hai 16 sa area nga gintabuan sang insidente.
