Patigayunon subong nga aga ang state funeral para sa national artist nga si Nora Aunor.
Suno sa National Commission for Culture and the Arts (NCCA) kag sa Cultural Center of the Philippines (CCP), maga-umpisa ang arrival honors sa Metropolitan Theater sa Manila 8:30 kag pagasundan sang tribute segment sa alas nueve.
Halin alas dose sa udto, himuon naman ang necrological services sa Libingan ng mga Bayani sa Taguig kun sa diin igalubong man ang Philippine cinema superstar.
Suno sa NCCA kag CPP, mahimo makatambong ang publiko sa necrological services, apang limitado lamang ang pulungkuan nga available.
Sa indi naman makatambong, mahimo magbantay sa livestream sang CCP kag NCCA sa funeral rites paagi sa ila Facebook pages.
Kagab-i, nagbisita si President Ferdinand ”Bongbong” Marcos Jr. kag si First Lady Louise Liza Araneta-Marcos sa haya sang beterana nga aktres sa Heritage Park sa Taguig.
Abril 16 sang napatay si Nora sa edad nga 71-anyos bangud sa acute respiratory failure.
Isa siya ka decorated personality nga nahingadlan nga National Artist sang 2022 bangud sa daku nga kontribusyon sang iya dinekada nga pagtrabaho sa industriya bilang isa ka actress, singer, kag film producer. Lakip sa iya iconic films amo ang Minsa y Isang Gamu-gamo (1976), Ikaw ay Akin (1978), Atsay (1978), Bona (1980), The Flor Contemplacion Story (1995), kag Himala (1982).
