Nagpagwa sang mensahe si Archbishop Midyphil Billones sang Archdiocese of Jaro kasunod sang pagtaliwan sang Santo Papa nga si Pope Francis kahapon, Abril 21.
Sa iya mensahe, ginpabutyag ni Billones ang dako nga pagpasalamat sa 12 ka tuig nga pagserbisyo sang Santo Papa sa tion sang pagpaubos, pagpalangga, kag pagpakig-upod sa mga pumuluyo.
Suno kay Billones, gintapos ni Pope Francis ang iya nga pagpanglakaton sa kalibutan sa adlaw sang pagkabanhaw, kun sa diin isa ka adlaw sang paglaum kag kabuhi nga bag-o.
Dugang pa ni Billones, ginpalapit sang Santo Papa ang simbahan kag ang mga tumuluo paagi sa gugma, kaayo, kag kaluoy.
Ginhangyo niya ang mga tumuluo nga magpangamuyo kag maghalad sang mga misa para sa kalag ni Pope Francis nga nagbilin sang kasubo sa bug-os nga Katolikong katilingban.
Ginpasidunggan man niya ang kabakod sang Santo Papa sa pagserbisyo sa mga imol, sa kalibutan, kag sa mga ginapabay-an sang sosyudad.
Ginhimo siya sang Diyos nga haligi kag manugpalangga nga naghalok sang tiil sang mga priso, naghibi upod sa mga biktima sang abuso, nagbukas sang iya tagipusuon sa mga migrante, kag nag-upod sa mga masakiton kag nasamaran nga mga tumuluo.
Ang ginbilin nga handum sang Santo Papa amo ang pagpadayon sang iya damgo nga ang Diyos yara, naga-upod, kag naga-ugyon sa aton kabuhi.
Gintapos ni Billones ang iya mensahe paagi sa pagpasalamat sa tanan nga ginbilin ni Pope Francis kag handa siya nga magpadayon sang damgo sang Santo Papa para sa Simbahang Katolika.
