Tatlo na ang napatay bangud sa tuman ka init nga panahon sa Iloilo City, santo sa data sang Iloilo City Disaster Risk Reduction and Management Office (CDRRMO) nga na-record sugod sang Abril 16 tubtob Abril 21, 2025.
Sa interview sang Bombo Radyo kay Dr. Mischelle Tanteo-Cayongcat, Medical Officer IV sang Iloilo City Disaster Risk Reduction and Management Office, iya ginpahayag nga may kabug-usan nga walo ka kaso sang heat related incident ang narekord sa syudad kon sa diin, lima ang lalaki kag tatlo ang babaye.
Suno kay Cayongcat, naga-edad sang pulo ka tuig ang pinakabata, samtang 61-anyos pataas naman ang pinakatigulang.
Gintuad man sini nga kalabanan sa complaint sang mga biktima amo ang tuman nga exposure sa init, apang may yara man nga nasapwan mismo sa ila puluy-an.
Lakip sa ginreklamo sang mga natungdan amo ang paglingin sang ulo, chest pain, pagtaas sang blood pressure, pag-blurred sang panan-awan, kag pagkalipong.
Nagpanugyan man ini sa publiko nga mag-inom sang madamo nga tubig, maglikaw magpainit saguwa, kag magsuksok sang light colored nga panapton agud makalikaw sa mga nasambit nga risgo.
