Gindagdagan sang show cause order sang Guimaras Provincial Legal Office ang tatlo ka opisyal sang Brgy. Hoskyn, Jordan, Guimaras, matapos nga ginbalabagan ang personnel sang Provincial Government Services Office (PGSO) nga magpatindog sang promotional tarpaulin sang Manggahan Festival 2025.
Ini amo sanday Punong Barangay Rolyn Faith Tayo, Barangay Kagawad Carmelin Dela Puerta kag Barangay Tanod George Melanio.
Sa interview sang Bombo Radyo kay Atty. Jose Ricsan “Trox” Tormon, Provincial Legal Officer, iya ginpahayag nga Abril 17, 2025 sang nakabaton sila sang report paagi sa pagtawag sang PGSO sa ila nga ginbalabagan ang ila pagtakod sang tarpaulin.
Suno kay Tormon, nagpakig-istorya ang lima ka opisyal sang Provincial Legal Office sa katapo sang PGSO kag ginkumpirma nga matuod ang natabo.
Ginklaro man sang natungdan nga ang show cause order ang agud mahibaluan ang ila bahin kag ma-eksplikar ang ila rason.
Gin-athag man sini nga ang tarpaulin ang wala sang ano man nga laragway sang mga kandidato sa eleksyon kag antes ginpaguwa, gin-usisa agud nga indi malaktan sang pagpamulitika.
Nakatalana naman nga ipatawag buwas nga adlaw ang mga involve nga mga opisyal agud nga ila atubangon ang pagpamalabag nga ila ginhimo.
