Naaresto na sang kapulisan ang mga suspek sa natabo nga pagpangbuno-patay nga ginaalegar nga nag-ugat sa road rage sa Brgy. Malapaya, Sara, Iloilo.
Ang biktima amo si Abner Panes, 30-anyos, residente sang Brgy. Ardemil, Sara.
Ang mga suspek amo sanday Jay Arceno, 28-anyos, Alyas Renie, 21-anyos, Alyas Rey, 23-anyos nga lunsay residente sang Barangay Domingo, Sara.
Ang isa pa ka suspek amo si alyas Rence, 26-anyos, residente sang Brgy. Malapaya.
Sa interview sang Bombo Radyo kay Police Captain Theodore Roosevelt Saboy, hepe sang Sara Municipal Police Station, iya ginpahayag nga antes ang insidente, halin sa discohan sa proper sang Barangay Malapaya ang biktima kadungan sang bisperas sang kapistahan kag sang pauli na ini sakay sa iya motorsiklo, may natabo nga road rage sa tunga nila sang mga suspek.
Suno kay Saboy, didto na ginbuno sang mga suspek ang biktima gamit ang kutsilyo kag screw driver nga gintunaan sang kamatayon sini.
Nakahunong na subong sa Sara Municipal Police Station ang mga suspek samtang nagapadayon ang imbestigasyon.
