Nagbilin sang 12 ka patay kag masobra 70 ka pilason ang panibag-o nga nga atake sang Russia sa Ukraine.
Ini ang pinakamakamamatay nga missile kag drone attack sang Moscow sa Kyiv halin sang Hulyo sang nagligad nga tuig.
Natabo man ini samtang padayon ang paninguha sa ceasefire nga ginaduso naman mismo sang Estados Unidos sang Amerika.
Suno kay Ukraine President Volodymyr Zelenskyy, indi sini anay pagdayunon ang iya official trip sa South Africa kag nagbalik na lang anay sa Kyiv bangud sa atake nga ginpahayag naglawig sang 11 ka oras.
Gin-anunsyo naman sang alkalde sang capital city nga magadeklarar ini sang official day of mourning bangud sa casualties nga ginbilin sang Russian forces.
Sandig sa Ukrainian air force, nagpalupad ang Russia sang 66 ballistic and cruise missiles, apat ka plane-launched air-to-surface missiles, kag 145 Shahed kag decoy drones sa Kyiv kag sa apat ka iban pa nga mga rehiyon sa Ukraine.
Nagpaguwa naman sang statement si US President Donald Trump nga wala siya nanamian sa amo nga atake, kag nagpanawagan ini kay Russian President Vladimir Putin nga untaton na ang strikes.
“Not necessary, and very bad timing. Vladimir, STOP!” pahayag ni Trump sa iya Truth Social media platform. Dugang sini: “Lets get the Peace Deal DONE!” (AP Photo/Efrem Lukatsky)
