Nag-atubangay na liwat sanday Ukrainian President Volodymyr Zelensky kag US President Donald Trump matapos ang ila pagbaisay sa Oval Office sa White House sang Pebrero.
Natabo ang panibag-o nga face-to-face encounter sa Vatican antes ang lubong ni Pope Francis, Abril 26.
Nakuhaan sang laragway ang duha nga nagapungko kag madalom ang gina-istoryahan minutos antes ang pagsugod sang funeral mass sa St Peter’s Basilica.
Suno sa White House, 15 minutos lamang ang ila pag-istoryahanay apang produktibo ini. Suno naman kay Zelensky, tuman ka symbolic ang ila naistorya kag posible pa nga mangin maragtason.
Antes sini nga diskusyon, may pahayag si Trump nga nagasentro sa panibag-o nga atake sang Russia sa Ukraine, kun sa diin ginkwestyon sini ang desisyon ni Russian President Vladimir Putin kun handa gid man ini nga tapuson ang gyera sini sa Kyiv.
Matandaan nga ang gyera man ang gina-istoryahan sang nagbaisay sanday Trump kag Zelensky sang Pebrero — topiko nga na-broadcast sa bilog nga kalibutan bangud natabo ang tension sa atubang mismo sang mga katapo sang media.
