Nagsaka na sa 11 ang kumpirmado nga patay kag masobra 20 ang pilason matapos gin-arado sang salakyan ang mga tawo nga naga-selebrar sang Filipino festival nga Lapu Lapu Day sa Vancouver, Canada.
Natabo ang insidente pasado alas otso sa gab-i oras sa amo nga lugar sang hinali lang nga nag-abot ang black Audi Sports Utility Vehicle kag ginpangbungguan sini ang tanan nga iya naagyan malapit sa East 43rd Avenue kag Fraser Street.
Pahayag sang pulisya, singko anyos ang edad sang pinakabata nga biktima, samtang 65-anyos naman ang pinakatigulang.
Wala pa sang ginpaguwa nga statement ang pulis sa motibo sang 30-anyos nga lalaki nga driver, apang gindugang nga kilala nila ang suspek nga may history sang mental health-related interactions sa mga otoridad.
Ginpahayag man sang otoridad nga kumpyansa sila nga indi ini isa ka akto sang terorismo.
Sandig pa sa Vancouver Police Department Major Crime Section, nagapadayon pa ang imbestigasyon subong, kag nagahingyo man ini sa publiko nga maghatag sang dugang nga impormasyon sa krimen.
