Na-obserbahan ni Iloilo Governor Arthur Defensor Jr. nga nagaperform sang maayo si Police Colonel Bayani Razalan bilang Iloilo Police Provincial Office (IPPO) Director sugod sang nagpungko ini sang 2024.
Sa interview sang Bombo Radyo kay Governor Defensor, iya ginkatingala ang gulpyada nga pag-relieve sa nasambit nga pulis.
Gin-athag man sini nga nga ginarespeto niya ang nangin administrative order sang amo nga ahensya.
Nagalaum man si Defensor nga kontani nga makaistorya siya kay Philippine National Police (PNP) chief General Rommel Marbil agud mahibaluan sini ang rason sang relieve order ni Razalan.
Gin-ako man sang gobernador nga wala sang ‘prior consultation’ sa iya ang amo nga tikang apang ginklaro man niya nga indi man gid ini kinahanglanon.
Suno kay Defensor, kon lantawon, isa ang IPPO sa may pinakamadamo nga nadagdag nga warrant of arrest sa bug-os nga pungsod.
