Naglunsyar sang Joint Anti-Fake News Action Committee (JAFNAC) ang Philippine National Police (PNP) sa multi-Purpose Hall sa Camp Crame – Quezon City, Metro Manila agud atubangon ang padayon nga paglapta sang misinformation kag disinformation sa pungsod.
Sa interview sang Bombo Radyo kay Police General Rommel Francisco Marbil, Chief sang Philippine National Police, iya ginpahayag nga gintukod ang Joint Anti-Fake News Action Committee nga kabahin sang inter-agency approach nga ginatuyo ang pagtapna sang mga nagalapta nga fake news ilabi na gid sa social media platforms.
Suno kay Marbil, target sang Joint Anti-Fake News Action Committee nga pasabton ang mga nagapalapta sang fake news kag maghimo sang sistema agud madali nga ma-takedown ang mga impormasyon sa social media kag iban pa nga online platforms.
Ang nasambit nga lihok ang gintambungan sang mga vital officials nga nagikan sa nagkalain-lain nga ahensya, kaangay sang Philippine Coast Guard (PCG), Department of Interior and Local Government (DILG), kag Presidential Communications Office (PCO).
Plano man sang PNP nga magpatukod sang national monitoring system gamit ang AI-powered dashboard para sa real-time detection sang mga trend sang disinformation.
