Nagpaandam kag nagbilin sang mga pahanumdom ang Iloilo Provincial Health Office (IPHO) sa mga ginikanan kasunod sang nakit-an nga pagsaka sang kaso sang hand, foot, and mouth disease (HFMD) sa probinsya.
Sandig sa data sang opisina halin sang Enero 1 tubtub sang Abril 26 subong nga tuig, nagdangat sa 487 ang mga kaso sang nasambit nga balatian kun sa diin 473 gid ang kabataan nga nagaedad sang siyam ka tuig panubo. Sa sini nga numero, 52 gid ang lapsag nga wala pa gani nabulanan ang edad.
Sa interview sang Bombo Radyo kay Dr. Maria Socorro Colmenares-Quiñon, head sang opisina, iya ginpahayag nga makaalarma nga infected na pati ang mga lapsag. Nagapakita ini suno sa natungdan nga nagalab-ot sa mga bata ang balatian bangud sa carriers nga posible amo ang mga hamtong na nga amo man ang nagadala sang virus sa balay.
Base man sa assessment sang opisina, nagasaka ang suspetsa sa household transmission bangud may mga ginikanan nga nagasiling nga wala man nagaguwa sa ila balay ang mga bata antes ang balatian.
Nagpanugyan ini sa mga ginikanan nga i-monitor gid ang kondisyon sang bata kun makataan sang sintomas kaangay sang hilanat, rashes, kag mouth lesions.
Kun may makit-an nga senyales, dapat gid nga mag-isolate agud nga indi na maglaton sa iban. Gina-abisuhan man ang tanan nga masami gid maghugas sang kamot kag maggamit sang alcohol-based sanitizers.
Nahibaluan nga ang iban pa nga sintomas sini nga kondisyon amo ang pagkadula sang gana sa pagkaon, pagsakit sang tutunlan, kag pagpalangapoy.
Sa Iloilo, ang may pinakamataas nga recorded cases amo ang Carles nga may 54, Concepcion nga may 41, Barotac Nuevo nga may 29, Balasan nga may 29, Santa Barbara nga may 28, Cabatuan nga may 24, Igbaras nga may 22, Lambunao nga may 20, Dumangas nga may 18, kag Tigbauan nga may 17.
