Nakilala na sang Special Investigation Task Group “Dayang” ang gunman sa pagpatay sa 89-anyos nga beterano nga journalist nga si Juan “Johnny” Dayang.
Si Dayang ang ginluthang-patay sang tatlo ka beses samtang yara ini sa sulod sang ila balay sang gab-i sang Abril 29, 2025.
Ang suspek amo si Kim Wency Bayang Antonio, alyas BB Boy, 39, anay gwardiya kag residente sang Bacoor, Cavite apang tumandok sang Balugo, Valencia, Negros Oriental.
Pinaagi sa backtracking, natumod ang identity sang suspek matapos nga mausoy ang lodging house nga gina-alegar nga gintiniran sini sa Kalibo humalin sang Abril 3.
Ginpahayag nga nag-arkila man ini sang nagkalain-lain nga motorsiklo nga gin-gamit sa pag-surveillance sa balay ni Dayang sa Villa Salvacion, Brgy. Andagao, Kalibo.
Nakumpirma man nga nadakpan na ini sadto sa drug buy-bust operation sa Pasig City sang 2021.
Nahibaluan nga nagtanyag na sang P500,000 nga reward money ang Aklan provincial government kag LGU-Kalibo para sa sin-o man nga makahatag sang impormasyon sa kapulisan para nga madakpan ang suspek.
