Gindeklara nga dead on arrival sa ospital ang driver sang motorsiklo nga nakabunggo sa nasumalang nga Sports Utility Vehicle (SUV) sa radial road sa Brgy. Lanit, Jaro, Iloilo City kagab-i, Mayo 10.
Ang driver sang motorsiklo amo si Alyas Nito, 58-anyos, kag residente sang Brgy. Tacas, Jaro, samtang, ang driver sang SUV amo si Alyas Rene, 56-anyos, kag residente sang Leganes.
Sa interview sang Bombo Radyo kay Patrolman Japeth Cudo, traffic investigator sang Traffic Enforcement Unit (TEU), iya ginpahayag nga halin sa Leganes ang SUV nga may duha ka sakay nga padulong kuntani sa Circumferential Road sa Buhang, Jaro, sang nagapadulong ini sa taytay nagbunggoanay ini sila sang motor nga halin naman sa Circumferential Road kag padulong naman sa Leganes.
Dugang pa sang natungdan nga apat ka linya ang karsada, apang one-way lang ang linya nga halin sa Leganes bangud ginakay-o ang dalan, kun sa diin ara pa sa right of way ang SUV, samtang naglapaw sa iya linya ang motorsiklo sang nagluntad ang aksidente.
Head-on collision ang natabo kag nagsuhot sa idalom sang SUV ang driver sang motor nga nagresulta sa patal nga pilas sa ulo kag sa dughan nga gintunaan sang iya kamatayon.
Nagagwa sa inisyal nga imbestigasyon nga posible ang gintunaan sang aksidente amo ang mamunog nga ulan bangud indi maayo kitaon ang dalan kag madulom ang porsyon sang karsada, apang padayon nga nagatipon sang CCTV footages ang kapulisan malapit sa lugar.
Sa subong, ara sa kustodiya sang kapulisan ang driver sang SUV samtang ginahulat pa ang pinal nga desisyon sang pamilya sang driver sang motorsiklo kun ang mga ini ang mapasaka sang kaso.
(Article: Bombo Phauline Pillora)
