Nagpakita sang kasulhay ang madamo nga mga botante sa Bonifacio Integrated School sa Iloilo City Proper subong nga 2025 Midterm Elections, bangud sa mas paspas kag mas hapos nga proseso nga dala sang bag-o nga feature sa proseso sang pagboto.
Ang Commission on Elections (COMELEC) nagpasugod sang paggamit sang mas moderno nga vote counting machines subong nga tuig bilang kabahin sang digital upgrade sa electoral process sang Pilipinas.
Isa sa pinaka-nauyunan nga parte sang ila pagboto amo ang facial recognition display nga nagabulig sa mga botante nga dali lang makita ang ila presinto, kag malikawan ang dugay nga pagpangita sang mga pangalan sa manual nga listahan.
Suno sa mga botante, mas malinong kag organisado na subong ang proseso kumpara sa nagligad nga mga eleksyon.
Ginalauman sang COMELEC nga ang pag-usar sang modernisado nga vote counting machines nga magapadugang sang kumpiyansa sang publiko sa eleksyon kag magapadayon ini sa masunod pa nga piniliay.
Text by: Bombo Lyka Sican Sandiego
