Ginpakita sang Filipina tennis star nga si Alex Eala kag Grand Slam champion nga si Coco Gauff ang ila abilidad matapos magbinuligay kag pagsulod sa quarterfinals sang 2025 Italian Open women’s doubles sa Rome.
Una nga beses nga naghugpong sanday Eala kag Gauff kun sa diin nagpakita sang pwersa matapos nga ginlutos ang Italian tandem nga sanday Tyra Grant kag Lisa Pigato sa score nga 6-2, 6-3 sa round-of-16 match.
Madinalag-on ang una nga set para sa duo nga Eala kag Gauff, apang nagpakita man sang pwersa ang Italian tandem sa ikaduha nga set.
Sa ikawalo nga hampang, nagpakita liwat sang mabaskog nga depensa sanday Grant kag Pigato, kun sa diin nagpatas ang score matapos sang isa ka slice ni Grant nga nagdala man sang hampang sa deuce point.
Apang, nagsala si Pigato sa masunod nga rally matapos nga naglapaw sa baseline ang ginpadala nga forehand, rason nga naka-abanse sanday Eala kag Gauff sa score nga 5-3
Nakuha sang magkapareha nga sanday Gauff kag Eala ang kadalag-an sa ila una nga match point matapos ang maalam nga drop shot ni Eala sa net.
Sa masunod nga hampang, makontra nanday Gauff kag Eala ang defending champions sang Italy nga sanday Sara Errani kag Jasmine Paolini sa quarterfinals.
