Naglab-ot na sa 76 ang narekord nga mga violators sang COMELEC gun ban sa Region 6.
Ang pinakaulihi nga narekord amo ang isa ka lalaki nga nadakpan nga may dala nga pusil kag bala sa RoRo Port, Brgy. Hoskyn, Jordan. Guimaras.
Ang arestado amo si alyas Geny, 52-anyos, residente sang San Miguel, Jordan.
Sa interview sang Bombo Radyo kay PLTCol Arnel Solis, spokesperson sang PRO6, iya ginpahayag nga ginpaidalon sa screening sa baggage screening machine ang lalaki kag didto na- detect ang armas.
Na-recover sa iya ang isa ka .22 caliber revolver, apat nga live cartridges sang caliber .22, kag isa ka firearm replica nga may magazine.
Wala man ini sang napakita nga mga dokumento.
Atubangon sini ang kaso nga paglapas sa R.A. No. 10591 ukon Comprehensive Firearms and Ammunition Regulation Act kag ang paglapas sa COMELEC Gun Ban.
Nahibaluan nga halin sa iya barangay ang lalaki agud magboto.
