Kritikal ang asawa samtang pilason naman ang bana sini matapos nga ginbuno sang mag-amay nga ila man lang kaingod balay sa Brgy. East Baluarte, Molo, Iloilo City.
Natabo ang insidente sa sulod mismo sang balay sang mga biktima nga sanday Rolando, 58 anyos kag iya asawa nga si Fatima, 54 anyos kag lunsay mga residente sang nasambit nga lugar.
Ang suspek amo sanday Eliseo, 60 anyos kag anak sini nga si Erwin, 28 anyos.
Sa interview sang Bombo Radyo Iloilo kay PCAPT Ryan Christ Inot, hepe sang Molo Police Station, iya ginpahayag nga ginsulod sang mga suspek ang puluy-an sang mga biktima samtang nagakatulog ang mga ini kag gipangbuno.
Suno kay Inot, yara man sa pihak nga kwarto ang tatlo ka kabataan sang mag-asawa kag nakit-an nila nga ginauyatan ni Eliseo si Rolando samtang ginabuno ini ni Erwin.
Matapos ang krimen, natigayon nga makapalagyo ang anak nga suspek samtang nadakpan naman ang amay sini nga nakahunong na subong sa Molo PNP.
Padayon naman nga ginabulong sa ospital ang mga biktima kun sa diin nag-angkon ang babaye sang walo ka pilas sa likod kag may yara man sang pilas sa atubang nga parte sang lawas.
Ginpahayag ni Inot nga naggwa sa ila imbestigasyon nga may daan na nga hiligut-anon sa tunga sang duha ka pamilya.
Pahayag ni Inot, isa sa posible nga rason sang krimen amo ang ginpahayag nga masami nga pagpabati-bati sang kabataan sang mga biktima sa suspek.
Naggwa man sa imbestigasyon nga may grupo ang bata sang mga biktima nga kontra naman sang grupo sang nakapalagyo nga suspek nga si Erwin.
Natalana nga pasakaan ang mag-amay nga suspek sang kaso nga frustrated murder.
