Naghimo sang maragtas ang bag-o nga mayor-elect sang Iloilo City nga si Raisa Treñas- Chu bilang pinakauna nga babaye nga elected mayor sang syudad.
Sa interview sang Bombo Radyo kay Treñas-Chu nga anak ni outgoing Mayor Jerry Treñas, iya ginpahayag nga ang kadalag-an ang pamatuod sang ikasarang sang mga babaye nga magpamuno sa isa ka progresibo nga syudad.
Suno sa iya, magluwas sa sini nga kadungganan, ginakabig niya nga dako nga responsibilidad nga iya tungdan ang kabaylo sang ginhatag nga pagsalig sa iya sang mga tawo.
Pahayag niya, mangalagad siya bilang iloy para sa syudad kag mga pumuluyo.
Mangin prayoridad naman sini ang paghatag sang dugang nga livelihood opportunities, mapaayo ang healthcare facilities kag services, kag labi nga mapabaskog ang mga programa nga pang-edukasyon para sa mga Ilonggo nga mga estudyante.
