Patay ang isa ka panday matapos nga ginbuno sang iya kaupod sa ilimnan sa Brgy. Nasapahan, Lemery, Iloilo.
Ang biktima amo si Rod, residente sang La Castellana, Negros Occidental apang temporaryo nga nagaistar sa Brgy. Nasapahan.
Ang suspek amo si alyas Arj, tumandok sang amo man nga lugar apang naga-istar subong sa Antique.
Sa interview sang Bombo Radyo kay Police Master Sergeant Dandy Gallego, imbestigador sang Lemery Municipal Police Station, iya ginpahayag nga nagainum-inom ang biktima sa poultry farm upod ang iban pa nga abyan sang nag-abot ang suspek.
Suno kay Gallego, may natabo nga komosyon kun sa diin ginsumbag sang suspek ang biktima.
Matapos ang pagpanumbag, nagpalagyo ang suspek apang makaligad ang pila ka minutos, nagbalik ini kag ginbuno ng biktima.
Pilas sa tiyan ang naangkon sang biktima nga gintunaan sang iya kamatayon.
Nagapabilin nga at-large ang suspek nga natukiban nga may criminal record man sa Antique.
Samtang ang biktima ang wanted naman sa La Castellana.
Sa pagpadalom sang imbestigasyon, nakaagi na sadto nga nag-updanay ang duha kun sa diin kaangay nga nagapatayog-tayog sang sugid ang mga ini.
Kaso naman nga murder ang ipasaka batok sa suspek.
