Pilason ang apat ka mga indibidwal matapos magbunggoanay ang motorsiklo kag traysikad sa Barangay Bagumbayan, Tigbauan, Iloilo.
Ang driver sang motorsiklo amo si Greg Palero, 55-anyos, kasado, mangunguma kag residente sang Barangay Cordova Sur sa amo nga banwa.
Ang trisikad naman ang ginamamneho ni Victor Cabinos, legal ang edad kaupod ang mga pasahero sini nga amo sanday Romar Bernadas, 45-anyos kag Alyas Willy, menor de edad kag lunsay residente sang Barangay Botong, Oton.
Sa interview sang Bombo Radyo kay Police Captain Alfred Mansoy, hepe sang Tigbauan Municipal Police Station iya ginpahayag nga padulong kuntani ang trisikad kag motorsiklo sa Poblacion, apang pag abot sa amo nga barangay, hinali lang nga nabunggoan sang motorsiklo ang trisikad.
Suno kay Mansoy, wala makit-an sang driver sang motorsiklo ang trisikad.
Bangud sa impact, nakaagum sang head injury ang driver sang motorsiklo nga nakatalana nga iga-refer sa hospital sa siyudad para sa nagakaigo nga pagbulong.
Samtang ang driver naman sang trisikad ang mga pasahero sini ang nagapabilin nga ginabulong sa Guimbal District hospital bangud sa naagum nga mga menor nga pilas.#
(Photo: Screengrab from Reden Lasanas Ortega; Article: Bombo Hanna Andasa)
