Nagpaguwa na sang warrant of arrest ang Regional Trial Court Branch 118 sa Angeles, Pampanga batok kay former presidential spokesperson Atty. Harry Roque.
Lakip man sa gindagdagan sang warrant amo si Cassandra “Cassy” Ong, kag ang 48 ka iban pa bangud sa kaso nga qualified human trafficking nga naangot sa ginaalegar nga scam hub nga Lucky South 99.
Nakasaad sa arrest warrant nga may 11 ka separado nga mga kaso nga gin-file batok sa mga akusado bangud sa ginaalegar nga paglapas sa Republic Act 9208 ukon ang Expanded Anti-Trafficking in Persons Act of 2012.
Ang Lucky South 99 amo ang isa ka POGO (Philippine Offshore Gaming Operator) facility sa Porac, Pampanga nga gin-raid sang otoridad sadtong 2024. Base anay sa pahayag sang Presidential Anti-Organized Crime Commission (PAOCC), nakakuha sila sang mga ebidensya nga nagapamatuod nga may natabo nga torture, kidnapping, kag sex trafficking sa amo nga pasilidad.
Na-rescue man sang otoridad ang 158 ka foreign employees gikan sa scam hub.
Sa mga hearing nga ginhimo sa Kamara kasunod sang raid, nagguwa ang pangalan ni Roque nga nagbulig agud nga makakuha sang operating license ang hub, samtang si Ong naman ang ginhingadlan nga authorized representative sang Lucky South 99. Base sa dokumento sang reapplication para sa lisensiya, si Roque man ang head sang legal department sang Lucky South 99.
Ginbasura naman sang Philippine Amusement and Gaming Corporation (PAGCOR) ang amo nga aplikasyon sang kompanya.
Nahibaluan nga didto subong si Roque sa The Hague, Netherlands kag nag-apply na ini sang asylum para sa proteksyon kag agud indi ini mapilit nga magpauli sa Pilipinas sa tunga sang mga akusasyon sa iya.
“I will seek all available legal remedies to secure my life and liberty which are currently under threat,” suno kay Roque. “I reiterate: This is not flight as evidence of guilt but the exercise of a human right to asylum,” pahayag sini sa Facebook video kasunod sang development sang reklamo batok sa iya.
Ginsulit sini nga gina-ipit siya sang administrasyon bangud nagapabilin nga loyal siya kay anay Presidente Rodrigo Duterte nga didto man naka-detain sa The Hague bangud sa kaso sini sa International Criminal Court (ICC) nga crimes against humanity nga naangot sa iya anay implementasyon sang drug war.#
