Patay ang manogbaligya sang isda sa Brgy. Sapa, Miagao, Iloilo matapos nga ginbuno sang isa ka solterito.
Ang biktima amo si alias Dol, 25-anyos, residente sang nasambit nga lugar; samtang ang suspek amo si alias Tanggol, 17-anyos, residente sang Baybay Sur, Miagao, Iloilo.
Sa interview sang Bombo Radyo kay Police Major Richard Lao, Officer in Charge sang Miag-ao Municipal Police Station, iya ginpahayag nga nagatindogan ang biktima sagwa sang iya nga balay upod sang iya nga iloy sang gulpi lang nga nag-abot ang suspek kag hinali nga ginbuno si alias Dol.
Suno kay Lao, mismo ang iloy sang biktima ang nakakita sang pagbuno sa iya nga anak.
Ginhingagaw pa dala ang biktima sa Guimbal District Hospital apang, ginbawian man sang kabuhi samtang ini ang ginabulong.
Ginalantaw naman sang otoridad ang motibo nga mahimo bangud sa daan nga hiligut-anon sa tunga sang magtimbang nga indibidwal.
Yara na sa kustodiya sang Miagao Municipal Police Station ang suspek kag nagapangatubang sang kaso nga murder.
Ginaimbestigaran naman sang Women and Children Protection Desk (WCPD) ang amo nga insidente.
