Pilason ang driver sang tricycle matapos madalasa sang pick up nga may karga nga isda sa Brgy. Agtambo, Passi City, Iloilo.
Ang biktima amo si Alyas Roque, 59-anyos, samtang ang driver sang pick up amo si Alyas Rino, 48-anyos, kasado kag residente sang Brgy. Dayao, Roxas City.
Sa interview sang Bombo Radyo kay Police Master Sergeant John Hersly Fajardo, Imbestigador sang Passi City Police Station, iya ginpahayag nga halin sa Roxas City ang pick up kag madeliver kuntani sang isda sa Passi City kag Calinog.
Base imbestigasyon sang kapulisan, may salakyan sa atubang sang pick up samtang nagapalapit ini sa intersection kag mapundo ini kuntani apang wala nagkagat ang preno kag nadulaan sang control rason nga nasalapay ang duha ka nagaparking nga tricycle sa kilid lakip na ang biktima nga gatindog.
Nakaagum ang driver sang tricycle sang menor nga kapilasan sa nagkalain-lain nga parte sang iya lawas, gindala ini sa ospital kag gilayon ma nga nakagwa.
Ginsabat naman sang driver sang pick up ang pagpabulong sa driver sang tricycle.
Text by: Bombo Pauline Pillora
