Ginpatpat sang Schools Division of Iloilo ang importansya ang bag-o lang ginpirmahan ni President Ferdinand Bongbong Marcos
ang Republic Act No. 12199 ukon ang “Early Childhood Care and Development System Act”.
Sa interview sang Bombo Radyo kay Dr. Nestor Paul Pingil, Chief Education Supervisor Curriculum Implementation Division sang Schools Division of Iloilo, iya ginpahayag nga ang programa ang magahatag sang prayoridad sa temprano nga edukasyon, nagakaigo nga nutrisyon, kag suporta agud ang mga kabataan nga Pilipino may maayo kag mabakod nga pagsugod sa kabuhi.
Suno kay Pingil, ang ECCD System Act isa sa mga yabi nga tikang nga ginarekomendar sang Second Congressional Commission on Education (EDCOM 2) agud mapasanyog ang sistema sang edukasyon sa pungsod kag mapanindugan ang mga kinamatarong sang tagsa ka kabataan.
Gin-repeal sini ang RA No. 10410 ukon ang “Early Years Act (EYA) sang 2013.”
Ini nagatuyo sa pagpanubo sang child mortality, pagsuporta sa child development, paghanda sang kabataan para sa pormal nga pag-eskwela, kag pagtukod sang mga sistema sang early intervention para sa mga bata nga may pinasahi nga mga kinahanglanon.
(SCHOOL)
Sa pagpirma sini nga laye, tuyo sang gobyerno nga mapauswag ang kaayuhan kag potensyal sang mga kabataan nga Pilipino sa tion sang ila mga formative years.
