Ginsuspende sang Commission on Elections (Comelec) ang proklamasyon sang Duterte Youth kag Bagong Henerasyon party-lists bangud sa mga petisyon angot sa ila disqualification
Suno sa resolusyon sang National Board of Canvassers, “seryoso ang alegasyon” sang paglapas sa mga layi sang eleksyon nga ginpasaka batok sa nasambit nga mga party-list.
Ginpahayag nga may duha ka petisyon nga ginpasa kontra sa Duterte Youth.
Ang una ginpasa ni Reeva Magtalas kag iban pa sang Mayo 15, kag ang ikaduha naman ginpasaka sang Youth Advocates for Climate Action Philippines kaupod ang mga student regents sang PUP kag UP sang Mayo 8.
Samtang, si abogado Russel Stanley Geronimo naman ang nagpasaka sang kaso batok sa Bagong Henerasyon.
Ginreklamo sang Duterte Youth ang suspensyon kag ginbuyagyag nga ini amo ang isa ka “grave abuse of discretion.”
Sa pihak nga bahin, nagtuad ang Bagong Henerasyon nga wala sila nakabaton sang pormal nga abiso angut sa kaso kag nagapanawagan sa Comelec nga ipadayon ang ila proklamasyon bilang representante sang kapin 319,000 ka mga botante.
Base sa naproseso nga boto, nakakuha sang 5.6% ang Duterte Youth nga kun sayuron tatlo ka puwesto sa Kongreso, samtang isa ka puwesto naman ang nakuha sang Bagong Henerasyon matapos makakuha sang 0.8% nga boto.
