Patay ang isa ka driver matapos makabunggo ang ginamaneho sini nga motorsiklo sa iya ginasundan nga motorsiklo sa Barangay Capuling, Dueñas, Iloilo.
Ang biktima nga ginbawian sang kabuhi amo si alyas Marco, 33-anyos, kag residente sang barangay Calacaan, Duenas.
Ang driver naman sang isa ka motorsiklo amo si alyas Rem, 20-anyos,construction worker, residente sang Barangay Anhawan, Duenas, Iloilo kag may angkas nga si Alyas Junjun, 18-anyos, construction worker kag residente sang Poblacion B, Dueñas.
Suno sa report sang Iloilo Police Provincial Office (IPPO), padulong kuntani si Alyas Rem sa Poblacion B halin sa Barangay Batuan sang hinali lang nga gin- sidewipe ini ni Alyas Marco pag- abot sa Barangay Capuling rason nga natumba ang duha ka mga motorsiklo.
Bangud sa impact, nakaagum si Alyas Marco sang patal nga pilas sa ulo kag ginhingagaw dala sa Don Valerio Memorial District Hospital sa Passi City para sa nagakaigo nga pagbulong apang gindeklara man nga dead on arrival makaligad ang pila ka minutos.
Samtang, nakaagom naman si Alyas Rem sang menor nga mga pilas sa iya kamot kag gasgas naman sa kalawasan ang naangkon sang angkas sini nga si Alyas Junjun.
Sa subong, nagapadayon pa ang imbestigasyon sang Duenas Municipal Police Station natuhoy sa amo nga aksidente.
