May yara na sang person of interest ang Oton Municipal Police Station sa natabo nga tuyo nga paghimulos sang isa ka rider sa isa ka 19- anyos nga dalaga sa Pulo Maestra Vita, Oton, Iloilo.
Sa interview sang Bombo Radyo kay Police Captain Lunelyn Talamillo, Deputy Chief of Police sang Oton Municipal Police Station, iya ginpahayag nga nakilala nila ang rider paagi sa pagpangusisa sa rider community sa probinsya gamit ang plate number nga nakuhaan sang litrato sang lalaki nga nagbulig sa biktima.
Suno kay Talamillo, ang nasambit nga rider ang indi aktibo sa rider community,sa baylo, nagabyahe lang ini kun may yara sang mag-contact sa iya nga pasahero.
Gin-athag man sang otoridad nga indi pa gid mapagwa ang pangalan ukon identity sang rider bangud nga nagakuha pa sila sang madamo nga ebidensya tuhoy sa insidente.
Sa subong, ginatinguhaan pa sang Oton Municipal Police Station nga ma-locate ang address sang amo nga rider agud nga mapadasig ang imbestigasyon.
Nahibaluan nga madamo sang dummy account ang rider nga ginagamit sa facebook kun sa diin amo man ang ginagamit niya sa pag-transact sa iya mga customers, rason nga indi pa 100% nga sigurado ang mga kapulisan sa pagbuyagyag sang iya nga identity.
