Guilty ang nangin desisyon sang Land Transportation Office (LTO) sa ginhimo nga imbestigasyon batok sa motovlogger nga si “Yanna” kaangot sa nag-viral nga pagbais sini sa isa ka pickup truck driver sa Zambales.
Ginpamulta ini sang P5,000 bangud sa paggamit sang motorsiklo nga wala sang side mirror.
Ginpabayad man ini sang P2,000 para sa reckless driving.
Magluwas sa multa, suspendido man sa gihapon ang iya nga driver’s license.
Gin-ako man ni Yanna nga indi siya ang tag-iya sang motorsiklo.
Ginbasehan sang LTO sa pag-isyu sang desisyon ang viral video, ang apology letter ni Yanna, kag ang affidavit sang pickup driver.
Sa pito ka pahina nga desisyon, ginsiling sang LTO nga makita gid sa mismo nga viral video ni Yanna ang delikado sini nga pagmaniobra sang gin- unahan niya ang pickup truck.
Nangin “kaso” ni Yanna ang Reckless Driving (Sec. 48 of R.A. 4136), pagmaneho sang motorsiklo nga wala sang side mirror, kag wala man sang plate number nga nagalapas naman sa Sec. 18 sang R.A. 4136.
Guilty ang nangin desisyon sang LTO sa duha ka nauna nga kaso, samtang naabaswelto naman ini sa isyu sa plaka sang motorsiklo bangud indi siya ang tag-iya.
