Ginbulgar ni reelected Senator Bong Go nga pareho nga nagapangaluyag sanday Senate President Francis “Chiz” Escudero kag Senator-elect Tito Sotto sa Duterte bloc kaangot sa posisyon sang pagka-Senate President.
Ini matapos nagguwa ang pangalan ni Sotto nga amo ang matunog nga ginabati-bati nga isunod kay Escudero kun magbukas na ang 20th Congress.
Suno kay Go, madamo pa sang iban nga naga-istorya sa ila kag bukas man sila sa sini nga mga istoryahanay.
Simple lang ang ila criteria suno kay Go nga amo ang pag-una sa interes sang Pilipinas, interes sang kada Pilipino, kag ipabilin nga independent ang Senado.
Kun si Senator Ronald “Bato” Dela Rosa ang pahamblon, lima sila ang myembro sang Duterte bloc nga amo siya, si Go, si Robin Padilla, si Imee Marcos, kag si Senator-elect Rodante Marcoleta.
Pahayag naman ni Go, wala pa sila sang desisyon kun sin-o ang ila suportahan nga mangin senate president, ukon magabutang sila sang kaugalingon nila nga kandidato para sa amo nga posisyon.
Matandaan nga una na nagpahayag si Sotto nga tatlo tubtub apat na ka mga senador ang nag-istorya sa iya agud nga iduso ini nga magpamuno sa upper chamber.
