Nagapatigayon ang grupo sang mga motorcycle riders sang adbokasiya agud maedukar ang mga motorista ilabi na ang mga pamatan-on tuhoy sa road safety.
Sa interview sang Bombo Radyo kay Mr. Felix Serisola, Regional Director sang Motorcycle Philippines Federation, iya ginpahayag nga may yara sila sang inisyatibo nga ginatawag nga “MOTOSKWELA.”
Suno kay Serisola, sa sini nga programa, nagahiwat sila sang road safety awareness seminar sa mga eskwelahan kag sa mga barangay.
Pahayag ni Serisola, target nila ang mga menor de edad bangud bangud sa kakulangan sa ihibalo kag eksperyensiya sa dalanon.
Dugang niya, ginatudlo man nga rason sang mga aksidente amo ang kakulangan sang disiplina sang mga riders.
Base sa record sang Iloilo Police Provincial Office, sang 2024, naglab-ot sa 1157 ang mga road accident kun sa diin 38 diri ang minors, samtang sa first quarter naman sang 2025,yara na sa 907 ang narekord nga aksidente kag 25 diri ang menor de edad.
Nahibaluan nga subong nga Mayo amo ang Road Safety Month.
