Dagdagan sang show cause order sang Land Transportation Office (LTO) Region 6 ang rider nga nagtuyo nga himuslan ang 19-anyos nga pasahero sini nga babaye sa Pulo Maestra Vita Oton, Iloilo.
Sa interview sang Bombo Radyo kay Atty. Gaudioso Geduspan II, Director sang Land Transportation Office, iya ginpahayag nga na-identify na sang talatapan ang rider nga nagtuyo nga manghimulos sa babaye kag nakabaton naman sang blotter halin sa kapulisan.
Suno kay Geduspan, i-refer sa legal office ang amo nga blotter agud nga gilayon madagdagan sang nasambit nga kaso.
Ginpahayag man sini nga lantawon sang talatapan ang mahimo nga rekomendasyon sang otoridad kon bala mahimo nga i-suspende ukon i-revoke ang lisensya sang rider.
Gin-athag man sang natungdan nga padayon ang verification sa plate number sang rider agud mangin accurate ang show cause order nga idagdag batok sa angkas rider.
Madumduman nga nagsakay ang biktima halin sa Jaro kag pakadto kuntani sa Pavia, Iloilo apang ginhapit ini sang rider sa nasambit nga lugar kag ginapahayag pilit nga ginpanaog sa motorsiklo kag tuyo nga himuslan.
Nakapangayo man sang bulig ang biktima sa naglabay nga mototista rason wala na madayon ang tuyo sang suspek.
Ginapahayag naluyag ang suspek sa iya pasahero.
Ginklaro man sang otoridad nga indi miyembro sang rider community ang suspek.
